చేవెళ్ల రోడ్డు ప్రమాదం, NewzFast Telugu (చేవెళ్ల, రంగారెడ్డి జిల్లా): రంగారెడ్డి జిల్లా చేవెళ్ల మండల పరిధిలో ఘోర రోడ్డు ప్రమాదం చోటుచేసుకుంది. పామెన గేటు సమీపంలో అతివేగంతో ప్రయాణిస్తున్న ఒక కారు అదుపుతప్పి తీవ్ర ప్రమాదానికి గురైంది.
వేగంగా వెళ్తున్న వాహనం ఒక్కసారిగా అదుపు తప్పి, రోడ్డు మధ్యలోని డివైడర్‌ను దాటుకుని అవతలి వైపు ఉన్న రహదారిపైకి దూసుకెళ్లి బోల్తా పడింది.
ఈ ప్రమాదంలో కారులో ప్రయాణిస్తున్న వారిలో రాజ్‌కుమార్ గౌడ్ అక్కడికక్కడే ప్రాణాలు కోల్పోగా, మరొక ముగ్గురు తీవ్రంగా గాయపడ్డారు. ప్రమాదాన్ని గమనించిన స్థానికులు వెంటనే పోలీసులకు సమాచారం అందించారు.
ఈ దుర్ఘటనలో బాధితులంతా షాబాద్ మండలం పొత్గల్ గ్రామానికి చెందినవారుగా పోలీసులు ప్రాథమికంగా గుర్తించారు. ప్రమాద సమయంలో కారులో మొత్తం నలుగురు వ్యక్తులు ప్రయాణిస్తున్నారు.
రాజ్‌కుమార్ గౌడ్ మరణంతో పొత్గల్ గ్రామంలో తీవ్ర శోకసంద్రం అలుముకుంది. కారులో ఉన్న మిగిలిన ప్రయాణికులు మురళి గౌడ్, ఒగ్గు వెంకటయ్య, కార్ల శివకుమార్‌లకు తీవ్ర గాయాలయ్యాయి.
సమాచారం అందుకున్న పోలీసులు సంఘటనా స్థలానికి చేరుకుని, క్షతగాత్రులను వెంటనే చికిత్స నిమిత్తం సమీపంలోని ఆసుపత్రికి తరలించారు.
కాగా, ఈ పామెన గేటు బ్రిడ్జి సమీప ప్రాంతం ప్రమాదాల జోన్‌గా మారిందని స్థానికులు ఆందోళన వ్యక్తం చేస్తున్నారు. ఈ ప్రాంతంలో వాహనాలు అదుపుతప్పి ప్రమాదాలకు గురికావడం ఇదే మొదటిసారి కాదని, గతంలో కూడా సరిగ్గా ఇదే ప్రదేశంలో అతివేగం కారణంగా కారు బోల్తా పడి ఒక వ్యక్తి మృతి చెందిన సంఘటన చోటుచేసుకుందని తెలిపారు.
వరస ప్రమాదాలతో ప్రయాణికులు భయాందోళనకు గురవుతున్నారు. పోలీసులు సంఘటనా స్థలాన్ని పరిశీలించి, కేసు నమోదు చేసుకుని ప్రమాదానికి గల పూర్తి వివరాలపై దర్యాప్తు జరుపుతున్నారు.
