తీవ్ర తుఫాన్, NewzFast Telugu: బంగాళాఖాతంలో ఏర్పడిన వాయుగుండం క్రమంగా బలపడి తుఫాన్‌గా, ఆ తర్వాత తీవ్ర తుఫాన్‌గా మారే అవకాశం ఉందని ఆంధ్రప్రదేశ్ రాష్ట్ర విపత్తు నిర్వహణ సంస్థ (ఏపీఎస్‌డీఎంఏ) మరియు వాతావరణ శాఖ తెలిపాయి. దీని ప్రభావంతో తెలుగు రాష్ట్రాలైన ఆంధ్రప్రదేశ్, తెలంగాణలో రాబోయే ఐదు రోజుల పాటు భారీ నుంచి అతి భారీ వర్షాలు కురిసే సూచనలు ఉన్నాయని అధికారులు వెల్లడించారు.
వచ్చే మంగళవారం ఉదయం నెల్లూరు మరియు నరసాపురం మధ్య దక్షిణ కోస్తా తీరాన్ని ఈ తుఫాన్ దాటే అవకాశం ఉందని అంచనా వేశారు. తీరం దాటే సమయంలో గంటకు 100 నుంచి 110 కిలోమీటర్ల వేగంతో ఈదురుగాలులు వీయవచ్చని హెచ్చరించారు.
ఆగ్నేయ బంగాళాఖాతం, అండమాన్ సముద్ర ప్రాంతాల్లో కొనసాగుతున్న తీవ్ర అల్పపీడనం పశ్చిమ-వాయవ్య దిశగా కదులుతూ బలపడుతున్నట్లు అధికారులు తెలిపారు.
ఏపీలోని పలు జిల్లాల్లో రాబోయే నాలుగు రోజుల పాటు మోస్తరు నుంచి భారీ వర్షాలు కురిసే అవకాశం ఉంది. నేడు కృష్ణా, గుంటూరు, బాపట్ల, ప్రకాశం, మార్కాపురం, నెల్లూరు జిల్లాల్లో అక్కడక్కడ మోస్తరు నుంచి భారీ వర్షాలు పడతాయని, రేపు ఏలూరు, పశ్చిమ గోదావరి, ఎన్టీఆర్, కృష్ణా, గుంటూరు, బాపట్ల, పల్నాడు, ప్రకాశం, మార్కాపురం, నెల్లూరు, తిరుపతి జిల్లాల్లో అత్యంత భారీ వర్షాలు కురిసే వీలుందని పేర్కొన్నారు.
తెలంగాణలోనూ నవంబర్ 4వ తేదీ వరకు వాతావరణం మారుతుందని వాతావరణ శాఖ స్పష్టం చేసింది. ఉమ్మడి వరంగల్, ఖమ్మం, రంగారెడ్డి, హైదరాబాద్‌తో పాటు యాదాద్రి భువనగిరి, సిద్దిపేట జిల్లాలలో ఉరుములు, మెరుపులతో కూడిన వర్షాలు కురుస్తాయని తెలిపారు.
నవంబర్ 2, 3 తేదీల్లో ఉమ్మడి ఆదిలాబాద్ మరియు మహబూబ్ నగర్ జిల్లాల్లో భారీ వర్షాలు పడే అవకాశం ఉందని హెచ్చరికలు జారీ చేశారు.
