ఆంధ్రప్రదేశ్ తుఫాన్ హెచ్చరిక, NewzFast Telugu (అమరావతి): ఆంధ్రప్రదేశ్‌కు తుఫాన్ల ముప్పు మరోసారి పొంచి ఉంది. ఇటీవల కురిసిన భారీ వర్షాలు, తుఫాను నష్టం నుంచి ఇంకా కోలుకోకముందే బంగాళాఖాతంలో మరో తీవ్ర వాయుగుండం వేగంగా బలపడుతూ ఏపీ తీరం వైపు దూసుకొస్తోందని భారత వాతావరణ శాఖ (ఐఎండీ) స్పష్టం చేసింది.
రానున్న కొద్ది రోజుల్లో ఇది తుఫానుగా రూపాంతరం చెంది తీరాన్ని తాకే అవకాశముందని వెల్లడించింది.
మచిలీపట్నం – బాపట్ల మధ్య తీరం దాటే అవకాశం
వాతావరణ నిపుణుల ప్రాథమిక అంచనాల ప్రకారం.. బంగాళాఖాతంలో కేంద్రీకృతమైన ఈ వాయుగుండం నవంబర్ 2 లేదా 3 నాటికి తీవ్ర తుఫానుగా మారనుంది.
ఇది మధ్య కోస్తాంధ్రలోని మచిలీపట్నం, బాపట్ల మధ్య తీరాన్ని దాటే సూచనలున్నాయి. తీరం దాటే సమయానికి గాలుల వేగం గంటకు 100 నుంచి 110 కిలోమీటర్ల వరకు చేరే ప్రమాదం ఉందని, సాధారణ తీర ప్రాంతాల్లో కూడా 45 నుంచి 65 కిమీ వేగంతో బలమైన ఈదురుగాలులు వీచే అవకాశం ఉందని హెచ్చరిస్తున్నారు.
మూడు రోజుల పాటు విస్తారంగా భారీ వర్షాలు
ఈ తుఫాను కారణంగా నవంబర్ 1 నుంచి వరుసగా మూడు రోజుల పాటు రాష్ట్రంలో విస్తారంగా భారీ వర్షాలు కురవనున్నాయి. ఆదివారం కృష్ణా, గుంటూరు, బాపట్ల, ప్రకాశం, మార్కాపురం, నెల్లూరు జిల్లాల్లో మోస్తరు నుంచి భారీ వర్షాలు పడనున్నాయి.
సోమవారం ఏలూరు, పశ్చిమ గోదావరి, ఎన్టీఆర్, కృష్ణా, గుంటూరు, బాపట్ల, ప్రకాశం, నెల్లూరు, తిరుపతి జిల్లాల్లో తీవ్ర నుంచి అతి తీవ్ర వర్షాలు కురిసే ప్రమాదం ఉందని తెలిపింది. తూర్పు గోదావరి, కోనసీమ, నంద్యాల, కడప, చిత్తూరు జిల్లాలనూ భారీ వర్షాలు ముంచెత్తనున్నాయి.
మంగళవారం విశాఖపట్నం, విజయనగరం, అనకాపల్లితో పాటు ఉత్తరాంధ్ర, రాయలసీమలోని పలు ప్రాంతాల్లో వర్ష ప్రభావం కొనసాగుతుంది.
అధికారుల ముందస్తు చర్యలు, మత్స్యకారులకు హెచ్చరికలు
ఏపీఎస్డీఎంఏ మేనేజింగ్ డైరెక్టర్ ప్రఖర్ జైన్ ముందస్తు చర్యలు చేపట్టాల్సిందిగా అధికారులను ఆదేశించారు. సముద్రం తీవ్ర అల్లకల్లోలంగా మారనున్నందున మత్స్యకారులు ఎవరూ వేటకు వెళ్లకూడదని, ఇప్పటికే వేటలో ఉన్నవారు వెంటనే సమీప తీరాలకు తిరిగి రావాలని స్పష్టం చేశారు.
లోతట్టు ప్రాంతాల ప్రజలను సురక్షిత ప్రాంతాలకు తరలించే ఏర్పాట్లు చేస్తున్నారు. వర్షాలు, ఈదురుగాలుల వేళ చెట్ల కింద నిలబడవద్దని, పొంగిపొర్లుతున్న వాగులు దాటే ప్రయత్నం చేయవద్దని ప్రభుత్వం కోరింది.
సోషల్ మీడియాలో వచ్చే అసత్య ప్రచారాలను నమ్మకుండా కేవలం అధికారిక ఐఎండీ బులెటిన్లను మాత్రమే అనుసరించాలని అధికారులు విజ్ఞప్తి చేస్తున్నారు.
