ర్యాపిడో డ్రైవర్ , NewzFast Telugu (హైదరాబాద్): నగరంలో రోజురోజుకు పెరుగుతున్న పార్సిల్ డెలివరీ సేవలను ఆసరాగా చేసుకుని ఓ మోసం వెలుగులోకి వచ్చింది. వంటరిగా విలువైన వస్తువులు పంపే సమయంలో అప్రమత్తంగా ఉండాలని ఈ ఘటన హెచ్చరిస్తోంది.
Oneindia Telugu కథనం ప్రకారం, హైదరాబాద్‌లోని జూబ్లీహిల్స్ పరిధిలో ఈ ఘటన చోటుచేసుకుంది.
వివో మొబైల్ ఫోన్ సంస్థ మేనేజర్ దత్త ప్రసాద్ నల్లపాటి తన బంధువుల ఇల్లు నాగోల్‌కు రూ. 62,383 విలువైన బంగారు ఉంగరాలు, గాజులను పార్సిల్‌లో పంపాలని నిర్ణయించుకున్నారు.
ఈ మేరకు ర్యాపిడో పార్సిల్ సేవలను ఆన్‌లైన్‌లో బుక్ చేశారు. కార్యాలయంలో ఉన్న సెక్యూరిటీ సిబ్బందికి ఆ బంగారు పార్సిల్‌ను డ్రైవర్‌కు అందించాల్సిందిగా ఆయన సూచించారు.
కార్యాలయానికి చేరుకున్న ర్యాపిడో డ్రైవర్ గీతిమెట్టు మురళికి సెక్యూరిటీ గార్డు పార్సిల్‌ను అప్పగించాడు. అయితే నాగోల్ వెళ్లేందుకు అదనంగా పెట్రోల్ నిమిత్తం రూ.
100 ఇవ్వాలని డ్రైవర్ కోరగా, మేనేజర్ దత్త ప్రసాద్ ఆ మొత్తాన్ని ఫోన్ పే ద్వారా పంపించారు. ఆ తర్వాత కొద్దిసేపటికి దత్త ప్రసాద్ డ్రైవర్‌కు ఫోన్ చేయగా స్పందన లేకపోగా, ఫోన్ స్విచ్ ఆఫ్ వచ్చింది.
దీంతో మోసపోయినట్లు గ్రహించిన బాధితుడు తొలుత ర్యాపిడో కస్టమర్ కేర్‌ను సంప్రదించినప్పటికీ తగిన పరిష్కారం లభించలేదు. చివరికి ఆయన జూబ్లీహిల్స్ పోలీసులను ఆశ్రయించగా, పోలీసులు కేసు నమోదు చేసి నిందితుడైన డ్రైవర్ కోసం గాలింపు చర్యలు చేపడుతున్నారు.
