బాలికలపై లైంగిక నేరాలు, NewzFast Telugu (సిరిసిల్ల టౌన్‌): బాలల పరిరక్షణ, బాలికలపై లైంగిక నేరాలను నిరోధించడం సమాజంలోని ప్రతి ఒక్కరి బాధ్యత అని జిల్లా న్యాయ సేవాధికార సంస్థ కార్యదర్శి, సీనియర్ సివిల్ జడ్జి పి లక్ష్మణాచారి పేర్కొన్నారు. ఆంధ్రజ్యోతి కథనం ప్రకారం..
శనివారం జిల్లా కేంద్రంలోని నెహ్రూనగర్ జిల్లా పరిషత్ ఉన్నత పాఠశాలలో తెలంగాణ రాష్ట్ర న్యాయ సేవాధికార సంస్థ ఆదేశాలతో ఈ అవగాహన కార్యక్రమం నిర్వహించారు.
జిల్లా న్యాయ సేవాధికార సంస్థ అధ్యక్షురాలు పి నీరజ సూచనల మేరకు ‘సురక్షిత్ బచ్పన్ అభియాన్’ పేరుతో విద్యార్థినులకు బాలల హక్కులపై అవగాహన కల్పించారు. ఈ సందర్భంగా ముఖ్య అతిథిగా హాజరైన పి లక్ష్మణాచారి మాట్లాడుతూ, ఆడపిల్లలకు తమ హక్కుల గురించి, మంచి స్పర్శ – చెడు స్పర్శ గురించి, అపరిచితులు అలాగే తెలిసిన వ్యక్తుల నుంచి ఎదురయ్యే ప్రమాదాల గురించి వారి వయస్సుకు తగిన రీతిలో అవగాహన కల్పించడం ఎంతో అవసరమని తెలిపారు.
ఫోక్సో చట్టంలోని నిబంధనలపై విద్యార్థినులు, ఉపాధ్యాయులు, తల్లిదండ్రులు పూర్తి అవగాహన కలిగి ఉండాలని ఆయన సూచించారు. పాఠశాలల్లో కేవలం విద్యా బోధనకు మాత్రమే పరిమితం కాకుండా పిల్లల భద్రతకు కూడా అత్యంత ప్రాధాన్యత ఇవ్వాలని వివరించారు.
ఈ కార్యక్రమంలో పాఠశాల ప్రధానోపాధ్యాయురాలు భాగ్య రేఖ, లోక్‌ అదాలత్‌ సభ్యులు చింతోజు భాస్కర్‌, న్యాయవాదులు పెంట శ్రీనివాస్‌, ఆడెపు వేణు, కళ్యాణి, ఉపాధ్యాయులు తదితరులు పాల్గొన్నారు.
