యాన్బూలో దసరా, బతుకమ్మ వేడుకలు, NewzFast Telugu (యాన్బూ, సౌదీ అరేబియా): మాతృభూమికి దూరంగా అరబ్బునాట అందరూ కలిసి ఆనందోత్సాహంతో పండుగ చేసుకోవడం ఒక మధుర అనుభూతిని ఇస్తుంది. ఆంధ్రజ్యోతి గల్ఫ్ ప్రతినిధి అందించిన సమాచారం ప్రకారం, సౌదీ అరేబియాలోని ఎర్ర సముద్రం తీరంలోగల యాన్బూ పారిశ్రామిక నగరంలో తెలుగు ప్రవాసీ కుటుంబాలు శుక్రవారం దసరా-బతుకమ్మ వేడుకలను అత్యంత వైభవంగా జరుపుకున్నాయి.
సౌదీ అరేబియాలోని మదీన రాష్ట్రంలో ఉన్న యాన్బూ నగరం చమురు అనుబంధ ఉత్పత్తులకు ప్రసిద్ధి. ఇక్కడ వృత్తి నిపుణులుగా ఉంటున్న భారతీయులలో తెలుగు ప్రవాసీయులు అనేక మంది ఉన్నారు.
తరాలు మారినా, వేరే ప్రాంతాలలో పుట్టి పెరిగినా తమ తెలుగు మూలాలను మరిచిపోకుండా ఈ వేడుకల్లో కుటుంబ సమేతంగా పాల్గొని పండుగ ఆనందాన్ని రెట్టింపు చేసుకున్నట్లు ప్రవాసులు తెలిపారు. నిజామాబాద్‌కు చెందిన సంజయ్, విశాఖపట్టణానికి చెందిన సతీష్ తదితరులు ఈ సందర్భంగా తమ అభిప్రాయాలను పంచుకున్నారు.
యాన్బూలోని తెలుగు ప్రవాసీ ప్రముఖులు కాశీరాజ్ కమ్మరి, రషీద్ ఖాన్, టాటా మాటూరి, రవి, ప్రకాష్, వేణు, రాము, విజయ్, అవినాష్, ప్రభాకర్ ఆధ్వర్యంలో ఈ వేడుకలు అంగరంగ వైభవంగా జరిగాయి. ఈ వేడుకల్లో స్త్రీ శక్తి పరమార్థంగా జరిగిన అమ్మవార్ల ప్రదర్శన ప్రత్యేక ఆకర్షణగా నిలిచింది.
చిన్నార్లు తనిష్క, మహిత కావేష్, ఉన్సి మాన్వి, రుత్విక, రమీజ్, లక్షిత, స్ఫూర్తి, జస్విత కృతిలు ఈ ప్రదర్శనను ప్రదర్శించగా, కవిత కమ్మరి దర్శకత్వం వహించారు.
అనంతరం బతుకమ్మలను సంప్రదాయ ఆటపాటలతో నిర్వహించి ఘనంగా నిమజ్జనం చేశారు. ఈ వేడుకల సందర్భంగా సౌదీలోని ప్రముఖ తెలుగు గాయకులు అంజద్, గోపిలు ఆలపించిన మధురమైన పాటలు సభికులను ఎంతగానో అలరించాయి.
