ఎల్ నినో యాక్షన్ ప్లాన్, NewzFast Telugu (హైదరాబాద్): రాష్ట్రంలోని టీచింగ్ హాస్పిటల్స్, తెలంగాణ వైద్య విధాన పరిషత్ (టీవీవీపీ) దవాఖాన్లలో రోగులకు ఎలాంటి అసౌకర్యం తలెత్తకుండా వైద్యారోగ్యశాఖ ముందస్తు ప్రిపరేషన్లు ప్రారంభించింది. ఎల్ నినో ప్రభావంతో తలెత్తే నీటి కొరత, విద్యుత్ అంతరాయాలను సమర్థవంతంగా ఎదుర్కొనేందుకు ప్రత్యేకంగా ‘ఎల్ నినో యాక్షన్ ప్లాన్’ను సిద్ధం చేసినట్లు బిగ్‌టీవీ లైవ్ వెల్లడించింది.
ఆసుపత్రుల్లో వైద్య సేవల్లో ఎలాంటి జాప్యం జరగకుండా ఈ చర్యలు చేపట్టారు.
తాగునీరు, పారిశుధ్యం, విద్యుత్ సరఫరాలో ఎక్కడా అడ్డంకులు రాకుండా ఉండాలని అధికారులను ఆదేశించారు. అన్ని ప్రభుత్వ ఆసుపత్రుల్లోని సంపులు, ఓవర్ హెడ్ ట్యాంకుల నీటి నిల్వ సామర్థ్యాన్ని ప్రస్తుత స్థాయి కంటే 50 శాతం మేర పెంచాలని స్పష్టం చేశారు.
గాంధీ, ఉస్మానియా, నిమ్స్ వంటి ప్రధాన బోధనాసుపత్రులతో పాటు అన్ని ప్రాంతీయ దవాఖాన్లలో ఈ నిల్వ కెపాసిటీని వెంటనే పెంచనున్నారు. నీటి ఎద్దడి ఉన్న చోట కొత్త బోర్ల తవ్వకంతో పాటు పాత బోర్లకు రిపేర్లు చేయించాలని నిర్ణయించారు.
విద్యుత్ సరఫరా నిలిచిపోయినా ఐసీయూ, ఆపరేషన్ థియేటర్లు, ఎమర్జెన్సీ వార్డుల్లో సేవలకు ఎలాంటి బ్రేక్ పడకుండా పవర్ బ్యాకప్ వ్యవస్థను బలోపేతం చేస్తున్నారు. కొత్తగా శక్తివంతమైన జనరేటర్లను ఏర్పాటు చేయడంతో పాటు, డీజిల్ నిల్వలను రిజర్వ్‌గా ఉంచాలని ఆదేశించారు.
ఎలక్ట్రికల్ ఆడిట్ నిర్వహించి ట్రాన్స్‌ఫార్మర్లు, వైరింగ్ లోపాలను సరిదిద్దాలని సూచించారు.
మౌలిక వసతులతో పాటు వైద్యులు, నర్సింగ్, పారామెడికల్ సిబ్బంది 24 గంటలూ అందుబాటులో ఉండేలా షిఫ్ట్ డ్యూటీలను ప్లాన్ చేశారు. వేసవిలో వడదెబ్బ బాధితుల కోసం ఓఆర్ఎస్ ప్యాకెట్లు, రీహైడ్రేషన్ ఫ్లూయిడ్స్, కూలర్లు మరియు ఏసీలతో కూడిన ఐసోలేషన్ వార్డులను సిద్ధం చేస్తున్నారు.
ఈ ప్రణాళిక అమలును పర్యవేక్షించేందుకు జిల్లా స్థాయిలో ప్రత్యేక కమిటీలను ఏర్పాటు చేసినట్లు సమాచారం.
