బంగారం ధరలు , NewzFast Telugu (హైదరాబాద్): ధనత్రయోదశి, దీపావళి పండగలను దృష్టిలో పెట్టుకుని పసిడి కొనుగోలు చేయాలనుకునే వారికి ఊహించని శుభవార్త అందింది. అంతర్జాతీయ మార్కెట్లలో నెలకొన్న బలహీన ట్రెండ్‌కు అనుగుణంగా దేశీయ మార్కెట్లలో శనివారం బంగారం, వెండి ధరలు భారీగా పతనమయ్యాయి.
AP7AM కథనం ప్రకారం, హైదరాబాద్ బులియన్ మార్కెట్‌లో శనివారం 24 క్యారెట్ల 10 గ్రాముల బంగారం ధర ఏకంగా రూ.3,380 తగ్గి రూ.1,38,880కి చేరింది. అలాగే 22 క్యారెట్ల 10 గ్రాముల ఆభరణాల బంగారం ధర రూ.3,100 క్షీణించి రూ.1,27,300 వద్ద స్థిరపడింది.
బంగారం బాటలోనే వెండి కూడా పయనిస్తూ కిలో ధర రూ.8,000 వరకు పతనమై రూ.2 లక్షల మార్కుకు దిగివచ్చింది.
దేశ రాజధాని ఢిల్లీలోనూ ఇదే పరిస్థితి కనిపిస్తోందని ఆల్ ఇండియా సరాఫా అసోసియేషన్ వెల్లడించింది. 99.9 శాతం స్వచ్ఛత కలిగిన 10 గ్రాముల బంగారం ధర రూ.3,200 తగ్గి సుమారు రూ.1.42 లక్షల స్థాయికి చేరింది.
అలాగే కిలో వెండి ధర రూ.4,200 తగ్గి రూ.1.86 లక్షల నుంచి రూ.1.90 లక్షల మధ్యకు పడిపోయింది.
ఈ భారీ తగ్గుదలకు పలు జాతీయ, అంతర్జాతీయ కారణాలు దోహదం చేసినట్లు సమాచారం. పశ్చిమాసియాలో కొనసాగుతున్న ఉద్రిక్తతల నేపథ్యంలో ముడి చమురు ధరలు బ్యారెల్‌కు 110 డాలర్ల ఎగువన ట్రేడ్ అవుతుండగా, ద్రవ్యోల్బణ భయాలు మరియు అమెరికా ఫెడరల్ రిజర్వ్ విధానాలు ఈ మార్పులకు కారణమని తెలుస్తోంది.
